Poesia del 1927 di Filippo Mistretta

Tra Vicari e la Sciara,

tra Caccamu e Lercara,

propriu difrunti a l’Alia,

nutricu d’una balia,

chi, comu una surgiva,

sempri lu pasci e civa;

e cchiu d'una nurrizza,

lu guarda e l'accarizza;

e guai a cu lu tocca

picchì c'è mamma Rocca!

surgi un paisi nicu,

ma beddu. beddu dicu.

O paiseddu miu, chinu d'arcanu,

chinu di gioia, chinu di ducizza!

Quannu nascisti ti ci misi manu

e celu e terra e la divina altizza.

All'occhiu miu chi guarda di luntanu,

tu ridi ncurunata di biddizza,

e a lu miu cori, o incantu suvrumanu,

dici paroli di sublimi ebbrizza!

Comu vulissi nprosa o npuisia,

c'una suavi miludia di trumma,

la duci cilibrari tua malia!

Ma temu ca lu to fascinu strumma

sta mia vuci senz’ali a fantasia,

o malandrina mia Roccapalumma.